Sa labing-una nga tion sa sulod sang 24 ka tuig, magabisita si Russian President Vladimir Putin sa North Korea.
Matabo ini subong nga Martes tubtub buwas, Myerkules, matapos nga gin-imbitar mismo ni North Korean leader Kim Jong Un si Putin sang nagbisita ini sa Far East sang nagligad nga Septyembre.
Katapusan nga nakatapak si Putin sa Pyongyang sang Hulyo 2000.
Lakip sa ginalauman suno sa foreign policy adviser ni Putin nga si Yuri Ushakov amo ang pagpirma sang duha ka pungsod sang partnership agreement nga magalakip sang isyu sa seguridad, apang una na sini gin-athag nga ini nga agreement ang wala naka-direkta sa anuman nga partikular nga nasyon.
Nahibaluan nga halin sang natabo ang gyera sa Ukraine, wala ginatago sang Moscow nga ginbuhi sini ang relasyon sa North Korea — bagay nga ginakaalarma sang United States kag mga kaalyado sini sa Europa kag Asya.
Gina-akusaran sang Washington ang Pyongyang nga nagasuplay sang armas sa Russia agud gamiton sini sa Ukraine, apang sulit-sulit ini nga ginpanginwala nanday Putin kag Kim.
Pagkatapos sa Pyongyang, magabisita naman ang Russian president sa Vietnam sa Hunyo 19-20 sandig man sa anunsyo sang Kremlin.
