ILOILO CITY – Indi magtambong si Russian President Vladimir Putin sa lubong sang pinakaulihi nga Soviet leader nga si Mikhail Gorbachev bangud sang isyu sang iya schedule.
Suno kay Kremlin spokesman Dmitry Peskov, ang lubong ang patigayunon sa Septyembre 3 apang indi makatambong ang presidente.
Si Putin ang nagpabutyag na sang iya pag-unong kay Gorbachev sa ospital kun sa diin siya napatay sang Martes sa edad nga 91.
Sa Russian state TV, ginpakita nga nagbutang si Putin sang bouquet sang pula nga rosas malapit sa bukas nga lungon ni Gorbachev antes naghipos sang makadali.
Nagduko ini kag gintandog ang lungon ni Gorbachev kag nagpanguros.
Ang seremonya sang lubong ni Gorbachev ang patigayunon sa Sabado sa Moscow Hall of Columns nga amo ang ginagamit para sa funeral services sang mga matag-as nga opisyal lakip na ni Joseph Stalin sang 1953.
Sa amo man nga adlaw, ilubong si Gorbachev sa prestihiyoso nga Novodevichy cemetery sa Moscow sa ingod sang iya asawa nga si Raisa nga napatay sang 1999.
