ILOILO CITY- Nag-abot na sa North Korea si Russian President Vladimir Putin agud makigkita sa leader nga si Kim Jong Un nga senyales sang mas nagadalom pa nga alyansa sang duha ka pungsod kag para sa kinahanglanon sang Moscow sang dugang nga mga armas halin sa Pyongyang agud ma- sustain ang giyera sini batok sa Ukraine.
Sa pag-abot ni Putin, napuno sang Russian flags kag posters sini ang mga dalanon agud abi-abihon ang iya una pagbisita sa sulod sang 24 ka tuig humalin sang tuig 2000.
Ini nga pagbisita ang tumalagsahon nga overseas trip para kay Putin humalin sang ginlunsar sini ang pagsakop sa Ukraine sang 2022.
Ini isa man ka maragtason nga hitabo para kay Kim nga wala sang bisan sin-o nga world leader nga ginbaton pasulod sa iya pungsod humalin sang Covid-19 pandemic.
Plano sang duha ka lideres nga magpirma sang bag-o nga strategic partnership.
Gin-athag naman sang iya aide nga si Yuri Ushakov nga ang agreement ang indi makabig nga provocative ukon may tinutuyo batok sa iban nga pungsod, sa baylo, ini agud masiguro ang stability sa northeast Asia.
Ini nga bag-o nga agreement ang magabulos sa dokumento nga napirmahan sa tunga sang Moscow kag Pyongyang sang 1961, 2000 kag 2001.
