ILOILO CITY – Ginbasura sang member states sang World Health Organization (WHO) ang Russian resolution angut sa health crisis sa Ukraine.
15 ang nagboto pabor sang resolution nga gin-co-sponsor sang Syria samtang 66 naman ang wala nagpabor sa ginpatigayon nga World Health Assembly, isa ka tuigan nga pagtililipon sang 194 ka states nga nagaserbe bilang decision-making body sang United Nations (UN) health agency.
Mabaskog nga ginkondenar sang member states sang WHO ang kinagamo sa Ukraine nga may kahimuan sang Russia kag pagpang-atake sa healthcare facilities pinaagi sa isa ka resolution.
Ang nasambit nga resolution nga may 88 ka mga boto ang wala nag-impose sang sanction batuk sa Russia apang naga-ban sa Moscow sa international stage sa palaabuton nga global forum.
Ang amo nga resolution ang nagapanawagan sa Russia nga untaton na ang pagpang-atake sa mga ospital.
