RWANDA – Nagapabilin nga zero death toll ang Rwanda kun Coronavirus Disease 2019 (COVID-19) ang pagahambalan.
Suno kay Bombo International Correspondent Jonelyn Lim, yara lamang sa 183 ang COVID-19 case samtang 88 na ang naka recover bangud nga gilayon nga ginpatuman ang lockdown matapos nga na record ang isa ka kumpirmado nga kaso sa Rwanda.
Ginpahayag ni Lim nga ginpauntat ang tanan nga byahe kag pagpatigayon sang pagtililipon, ginpasirado ang tanan nga border kag ginpatuman sang curfew, pagsuksok sang facemask, sanitation kag ang pag check sang body temperature sa pagsulod sa commercial establishment.
Nakabulig man sa pagpahagan-hagan sang paglapta sang virus amo ang istrikto nga pagpatuman sang quarantine protocol kag nagasunod ang kadam-an kun sa diin pagkapreso kag pagbayad sang multa ang mangin silot sa violators.
Kasubong sa Pilipinas, may ginahatag man nga quarantine pass agud nga makapamalaklon sa mga public market, grocery stores kag botika apang sa subong, ang essential business lamang ang ginapahanugutan nga magbukas.
Lakip sa mga ginpasirado amo ang remittance center rason nga indi makapadala sang kwarta ang mga Overseas Filipino Workers sa Rwanda.
May yara man sang bulig nga ginahatag ang gobyerno sang Rwanda apang wala diri nalakip ang mga Overseas Filipino Worker bangud nga ang Philippine Embassy ang nahamtang pa sa Kenya.
Isa man sa dalayawon nga lihok sang gobyerno sang Rwanda amo ang hayag nga paghatag sang report kag ang pag-angkon sang bastante nga Personal Protective Equipment kag test kits.
