Gindeklarar ang isa ka semana nga mourning period sa South Korea kasunod ang plane crash sa Muan International Airport nga ginkamatay sang 179 ka mga tawo.
Sandig sa anunsyo ni acting President Choi Sang-mok, magalawig ini tubtub sa Enero 4. Magluwas diri, may igabutang man nga 17 ka memorial altars sa bilog nga pungsod.
181 ang sakay sang Boeing 737-800 sang natabo ang aksidente, buot silingon, duha lang gid ka tawo ang nakaluwas nga amo ang babaye kag lalaki nga crew members.
Wala pa gin-release ang identity sang mga pasahero kag wala pa nahibaluan kun ano ang ila nationalities. Apang base sa fire service, ang pinakabata nga biktima naga-edad sang tatlo ka tuig samtang 78-anyos naman ang pinakatigulang.
Samtang, nagpaguwa naman sang public apology ang CEO sang South Korean airline nga Jeju Air kasunod sang amo nga insidente.
Suno kay CEO Kim E-bae, indi pa subong matumod kun ano gid ang rason sang crash apang suno sa iya, wala gid ini anay sang record sang aksidente kag wala man nakitaan sang senyales sang malfunction.
Ginpasalig sang airline nga maga-kooperar ini sa mga imbestigador kag suportahan ang pamilya sang mga biktima.
Nag-bow man ang CEO kag iban nga opisyal sang airlines agud ipakita ang ila pagpangayo sang pasaylo.
Halin ang Jeju Air flight 7C2216 sa Bangkok, Thailand antes ang insidente.
Ginalantaw nga may pag-malfunction sa landing gear, kag may impormasyon man nga nakahimo pa ang piloto sang mayday call matapos nagpaandam ang control tower kaangot sa mga pispis nga yara sa area.
Ini ang ginakabig nga pinakamakamamatay nga trahedya sa aviation industry sang South Korea sa sulod sang masobra duha ka dekada.
