Ginabantayan ang panibag-o nga tuyo nga arestuhon subong nga adlaw ang na-impeach nga president sang South Korea nga si President Yoon Suk Yeol.
Ini bangud karon man sa tungang gab-i maga-expire ang warrant of arrest nga ginpaguwa batok kay Yoon bangud sa ginaalegar nga insurrection kaamngot sa iya gulpyada nga pagdeklarar sang martial law sang Disyembre.
Suno kay Bombo Danah Vasquez, international correspondent sa South Korea, halin sang napaslawan ang criminal investigators nga makasulod sa presidential compound sang nagligad nga Biyernes bangud sa security detail kag mga soldado nga naga-protekta kay Yoon, may ginahimo sila subong nga bag-o nga estratehiya apang ginasigurado nga wala sang may mahalitan nga mga sibilyan.
Matandaan nga anum ka oras ang standoff sang Biyernes tubtub nagdesisyon ang otoridad nga maghalin na lang anay agud nga indi na madalahig ang mga tawo.
Bisan naga-snow subong sa Seoul, linibo ka mga supporters sang presidente ang nagatipon gihapon sa guwa sang iya nga official residence.
Kahapon, minus 5 degrees Celsius ang temperatua kag masobra 6 cm ukon 2.4-inches ang snow sa pila ka parte sang Seoul apang may protesters nga nagpaligad sang gab-i sa downtown para lamang sa ila nga kawsa para kay Yoon.
Una naman nga gin-athag sang presidential security service nga indi sila magkooperar sa officials nga maga-aresto kay Yoon bangud sa legal debate nga nagapalibot sa isyu sang pagdakop sa iya.
Nahibaluan nga si Yoon amo ang first incumbent South Korean president nga gindagdagan sang arrest warrant kasunod sang iya tikang sa martial law kag nagpa-ibwal pa gid sang political chaos sa South Korea nga amo ang fourth-largest economy sa Asya.
