Bangud sa iya aktibo nga liderato kag adbokasiya sa komunidad kag sa kabataan, madamo na sang nabaton nga pasidungog si Ayumi Cassandra Sumagaysay Zerrudo kag isa na diri ang pagkilala sa iya bilang Ilongga youth leader kag ginhingadlan man ini bilang Miss Beauty with a Purpose Western Visayas 2024 kag amo man nga Outstanding Student Leaders sa syudad sang Iloilo.
Sa pagpakigbahin man sang istorya ni Zerrudo sa Bombo Radyo Iloilo, iya ginpahayag nga sa kada pageantry nga dapat intrahan sang isa ka kandidata importante ang iya adbokasiya.
Suno pa sa iya nga ini ang rason kun ngaa naga-colaborate kag nagabinuligay ang nagkalain-lain nga organisasyon bangud sa adbokasiya nga gusto mo mapasangkad.
Nahibaluan nga sa karon nagaserbe man si Zerrudo bilang Q&A mentor sang mga pageant titleholders sa Iloilo agud mapabaskog ang kumpiyansa kag abilidad sang mga kababainhan sa public speaking.
Dugang pa diri, ini man siya ang ginpasidunggan nga Lakambini ng Kalikasan Iloilo City 2023, Miss Philippine Youth Iloilo 2025 Princess kun sa diin nakuha sini ang Best in Interview sa amo nga pageant.
Suno sa iya, ginahimo niya nga plataporma ang iya mga korona agud makahatag inspirasyon kag paglaum sa kabataan kag sa iya komunidad.
