ILOILO CITY – Wala pa sang may nabaton nga sabat si Iloilo City Mayor Jerry Treñas sa iya sulat nga ginpadala kay Department of Health Sec. Francisco Duque III.
Ang nasambit nga sulat sang alkalde ang napetsahan sang Oktubre 12 kag ini ang may kaangtanan sa COVID-19 data nga ginapaguwa sang ahensya kag sa data nga ginapaguwa sang City Epidemiology and Surveillance Unit.
Santo sa sulat sang alkalde, wala nagasanto ang ginapaguwa nga daily COVID-19 data kag ini ang nagatuga sang pagsalangisag sa publiko.
Partikular nga ginhalimbawa Treñas ang data sang Oktubre 10 kun sa diin santo sa data sang Department of Health, 136 ang total new cases sa Iloilo apang santo naman sa data sang City Epidemiology and Surveillance Unit, naglab-ot lamang sa 24 ang new cases.
Sang gin-usisa, ang 136 nga new cases nga na record sang Department of Health ang kombinasyon sang data gikan sa Iloilo City kag Iloilo Province.
Natukiban nga 80 gikan sa 136 ang na record sa Iloilo City apang ang nasambit nga data ang accumulative number humalin sang Oktubre 4 tubtub Oktubre 9.
