ILOILO CITY – Nagahingyo ang pila ka mga drivers sa syudad sang Iloilo nga dugangan ang seating capacity sang mga de-pampasahero nga mga jeep sa syudad sang Iloilo.
Sa interview sang Bombo Radyo kay Raymundo “Boyet” Parcon, presidente sang Iloilo City Loop Alliance of Jeepney Operators and Drivers Association (ICLAJODA), iya ginpahayag nga may yara sang ginpadala nga letter of request (dated November 20) kay Iloilo City Mayor Jerry Treñas.
Sa amo nga sulat, gina-apelar nga pataason sa 60% tubtob 70% ang seating capacity ukon dugangan sang tag-isa ukon duha ang mahimo makapungko sa kada side sang jeep.
Ini agud mahatagan man sang dugang nga income ang mga driver kag agud ma-cater man ang mga pasahero nga wala sang sakyan ilabi na kun rush hours sa syudad.
Nagpasalig man ang natungdan nga i-adjust man sang mga drivers ang ila nga mga barriers kun pahanugutan na ang amo nga hingyo.
Sa subong, 50 percent ang passenger load capacity nga ginapahanugutan sa mga Public Utility Jeepneys (PUJs) sa syudad.
Samtang, padayon pa ang istoryahanay sang COVID-19 team kag Iloilo City Government natuhoy sa hingyo sang ICLAJODA.
Sa interview sang Bombo Radyo kay Jeck Conlu, COVID-19 team spokesperson sang Iloilo City Government, iya ginpahayag nga ipalab-ot pa ini nga concern sa Land Transportation Franchising and Regulatory Board.
Suno kay Conlu, sarang lang makahatag sang rekomendasyon ang Iloilo City Government.
