Kadungan sang national disability prevention and rehabilitation week sa ikatatlo nga semana sang Hulyo, ginpamatud-an sang isa ka may kasablagan sa lawas nga indi upang ang iya kondisyon agud ipakita sa kalibutan ang iya ikasarang kag abilidad.
Sa interview sang Bombo Radyo kay Kris Catequista Traviña, 33, kag isa ka Persons with disabilities (PWDs), iya ginpahayag nga may yara siya sang Apert syndrome, isa ka genetic disorder nga nagapugong sa normal nga pagdako sang bagul sang isa ka indibidwal nga nagaapekto sa hurma sang ulo kag nawong.
Suno kay Traviña, bangud sa iya kondisyon, nakaeksperyensya man siya sang pagpang-bully samtang naga-eskwela sadto.
Apang bangud sa iya pagtuo sa Diyos kag sa pagpalangga nga ginahatag sang iya pamilya, nalampuwasan niya ang kabudlay samtang nagadako sa diin naka-graduate siya sa kurso nga Bachelor of Science in Information Technology, nakatrabaho sa isa ka printing press, kag subong isa siya ka negosyante.
Humalin sang high-school, mahilig man si Travina sa pagsulat sang poem sa diin, sang 2013, naka-publish siya sang libro.
Nakasulat man siya sang pila ka mga kanta sa diin niya nabubo ang iya emosyon kag napasakop man sadto sa Bombo Music Festival.
Abiso niya sa mga kaangay niya nga may sablag lawas, indi magkakapoy sa pagtuo sa Diyos bangud ang mahal nga makaako lamang ang makahatag sang paglaom sa tunga sang mga pagpanghangkat kag kabudlay.
