Apisar nagakatapikan naman sang COVID-19 ang mga kabataan sa Pilipinas, ginaduso sang grupo sang pediatricians nga unahon sa pagbakuna ang mas vulnerable nga sektor nga amo ang mga tigulang.
Suno sa grupo nga Philippine Pediatric Society kag Pediatric Infectious Disease Society of the Philippines, kun mabakunahan ang bastante nga porsyento sa priority adult groups, pwede na sa vaccination ang mga bata edad 12 anyos pasaka ilabi na ang may comorbidities kag ang mga nagapuyo sa mga lugar nga may mataas nga transmission sang virus.
Sa bahin naman sang National Task Force Against Covid-19 (NTF), ginaduso nga sa fourth quarter subong nga tuig umpisahan ang pagbakuna sa kabataan.
Sa interview sang Bombo Radyo kay Dr. Fejelia Faulan, pediatric infectious specialist sa syudad sang Iloilo, iya ginpahayag nga wala man sang dapat kabalak-an sa safety and efficacy sang bakuna bangud apisar emergency use authorization (EUA) pa lang ang nahatag kag wala pa sang full approval, wala ginlaktawan ang proseso bangud nakalab-ot ini sa Phase Three trial.
Sa Phase Three suno kay Faulan, linibo ang nadala sa clinical trial agud nga mapamatud-an nga epektibo ang bakuna sa mga kabataan.
“Although under kita sa ginatawag nga emergency use sang vaccine, indi ini pinagusto lang. Although ginpadasig ang time frame, ang process wala ina ginalaktawan. Kun sa safety, ginalantaw gid ina ang safety. Indi magamit ang vaccine kun wala nakalab-ot sa Phase 3 trial. Kun maghambal ka nga Phase 3, linibo ina ang nadala sa study… ginalantaw ina kun safe kag effective [ang bakuna] sa population nga gusto mo.”
Sa Pilipinas, ang bakuna pa lang sang Pfizer ang nahatagan sang EUA agud nga matublok ang bakuna sa edad 12 tubtub 15 anyos.
Nag-apply man subong ang Moderna para magamit man sang mga bata; samtang rejected naman ang application sang Sinovac bangud sang kakulangan sa clinical trial.
Apang mismo ang Department of Health (DOH) ang nagsiling nga vulnerable populations ang una nga priority bangud sang limitado nga suplay sang bakuna.
Bilang precaution man sa COVID-19, naga-suggest ang pediatricians nga unahon sa pagbakuna ang mga adults nga may upod nga kabataan sa sulod sang balay. ##
