𝗜𝗟𝗢𝗜𝗟𝗢 𝗖𝗜𝗧𝗬 – Mangin epektibo na sa Nobyembre 17, 2024 ang saka sa sweldo sang private sector kag domestic workers sa Western Visayas.
Sa interview sang Bombo Radyo kay Atty. Sixto Rodriguez, Jr., director sang Department of Labor and Employment (DOLE) Region 6, iya ginpahayag nga gin-aprubahan na sang National Wages and Productivity Commission ang dugang nga sweldo para sa mga mamumugon pinaagi sa Wage Order No. RBVI-28.
Suno kay Rodriguez, may yara sang saka sa sweldo halin sa P33 tubtob P40 para sa mga mamumugon nga nagatrabaho sa mga private establishments kag P1,000 naman para sa mga kabulig sa rehiyon.
May yara man sang dugang nga P33 para sa non-agricultural ukon ang may yara sang masobra 10 ka mga empleyado sa diin halin sa P480 nga sweldo subong, makabaton na sila sang P513 nga sweldo kada adlaw.
May dugang man nga P35 para sa non-agricultural nga may 10 ka mga empleyado panubo halin sa P450 nga sweldo, makabaton na sila sang P485 nga sweldo kada adlaw.
Para naman sa mga agricultural workers, may yara sang dugang nga P40 nga sweldo halin sa P440 nga mangin P480.
Dugang nga P1,000 kada bulan naman ang sweldo sang mga kabulig halin P5,000 nga mangin P6,000.
Ang saka sa sweldo ang magabenepisyo sa 193,032 minimum wage earners kag 160,795 domestic workers kun sa diin 31 percent diri ang yara sa live-in arrangements.
