ILOILO CITY – Mahimo na nga makabyahe ang mga sakayang pandagat nga may ruta Iloilo City-Bacolod City vice versa.
Ini ang kasunod sang ginpaguwa ni Iloilo City Mayor Jerry Treñas nga Executive Order No. 167 ukon An Executive Order Allowing the Resumption of Travel from Bacolod City to Iloilo City vice versa effective 14 October 2020.
Sa interview sang Bombo Radyo kay Treñas, iya ginpahayag nga wala na sang requirements nga dapat dal-on ang mga pasahero bangud nga lunsay ginpaidalom sa General Community Quarantine ang Iloilo City kag Bacolod City.
Ang nagakadapat lang nga siguraduhon suno kay Treñas amo nga ginasunod lang ang minimum health standards, safety protocols kag ang paggamit sang health declaration card.
Mangin epektibo ang nasambit nga mandu tubtub nga wala sang panibag-o nga Executive Order nga ginpaguwa may kaangtanan sa byahe sang mga sakayang pandagat.
