Wala pa gihapon nakapili si Iloilo Governor Arthur Defensor, Jr. kun sin-o ang iya mangin running mate sa nagahilapit na nga 2025 elections.
Sa interview sang Bombo Radyo sa gobernador, iya ginpahayag nga “madamo” siya sang ginapilian apang nagpamalibad anay nga isapubliko kun sanday sin-o ini nga mga pulitiko kag kun diin naghalin nga mga distrito.
Suno pa sa gobernador, madamo pa siya sang ginakonsiderar antes makadesisyon kun sin-o ang updon sa piniliay, apang wala siya sang gin-set nga timeline.
Ginrason man sini nga masako pa siya subong bangud madamo sang problema nga kinahanglan tutukan ang provincial government kaangay sang mpox kag dengue.
Magluwas diri suno pa sa natungdan, may palaabuton pa nga convention ang ruling party nga Partido Federal ng Pilipinas sa temprano nga bahin sang Septyembre kun sa giin ginapaabot nga may ipasar nga mga resolusyon, may reorganization, kag istoryahan man ang direksyon sang partido.
Si Defensor, chairman sang amo nga partido sa regional level, ang nagsulod sa PFP sang Agusto 2023.
Ini na ang ika-duha nga termino sang natungdan bilang gobernador kag gin-anunsyo sini sang Pebrero ang iya intensyon nga magpa-reelect sa posisyon.
Wala sang matunog nga gina-istoryahan nga magakontra sa iya apang madamo ang naga-guluwa nga pangalan kun sin-o ang iya mangin political tandem.
Lakip sa inisyal nga mga pangalan nga namensyonar sa mga espekulasyon kag reports amo sanday 2nd District Representative Michael Gorriceta, 5th District Representative Raul “Boboy” Tupas, 4th District Board Member Domingo Oso Jr., kag Iloilo 1st District Rep. Janette Garin.##
