Iloilo City – Ginpatpat sang Iloilo City Health Office ang mga pamaagi agud nga malikawan ang paglaton sang hand, foot, and mouth disease sa mga school age children.
Lakip diri amo ang paghugas sang kamot antes magkaon kag ang pagsuksok sang face mask.
Sa interview sang Bombo Radyo kay Dr. Roland Fortuna, Medical Officer IV sang Iloilo City Health Office, iya ginpahayag nga naga-edad sang 10 paidalom ang masami nga nagakalatnan sang amo nga balatian.
Base sa data sang Iloilo City Health Office, ang Iloilo City ang may yara sang kabug-usan nga 139 nga kaso sang hand, foot, and mouth disease as of February 1, 2023.
Sa amo nga numero, nagapanguna ang distrito sang Arevalo nga may 64 kag Mandurriao nga may 51.
Panugyan pa ni Fortuna sa mga ginikanan, sa tion nga may mabatyagan ang ila kabataan nga sintomas kaangay sang rashes kag pagpalangatol sang tutunlan, mas maayo nga indi anay pagpa-eskwelahon kag i-isolate.
Nagakadapat nga magpahuway anay sang maayo ang bata kag mag-inom sang madamo nga tubig.
Dugang pa sang natungdan, isa pa ka semana kag maka-recover ang pasyente sa amo nga balatian.
