ILOILO CITY – Nadakpan sa drug buy bust operation sang Provincial Drug Enforcement Unit (PDEU) Team 3, ang salaligan sang ginakabig nga no. 1 drug lord sa Western Visayas kag national target nga si Richard Prevendido.
Ang subject amu si Ruel Elosindo Deocampo alyas Kano, 32, sang Barangay Calaigang, San Rafael, Iloilo.
Ginpahayag sa Bombo Radyo Iloilo ni Police Chief Insp. Charlie Sustento, team leader sang PDEU Team 3, si Deocampo ang drug courier ni Prevendido sa fifth district sang Iloilo.
Nabaklan ini sang isa ka sachet sang suspected shabu sa balor nga P700.00
Nakuha man kay Deocampo ang dugang nga anom ka sachet sang suspected shabu, .38 caliber revolver nga may live ammunition kag 12 gauge shotgun nga may isa ka live ammunition.
Madumduman nga sini nga weekend, duha man ka mga tinawo ni Prevendido ang napatay sa drug buy bust operation.