Gin-athag sang Department of Science and Technology-Food and Nutrition Research Institute (DOST-FNRI) nga indi madutlan sang antibiotic ang mga manok nga may ara sang Salmonella bacteria nga ginabaligya sa mercado sa Metro Manila.
Suno sa report sang ahensya, yara sa 94.7 percent ang Salmonella bacteria nga nakit-an sa mga manok kag 76.3 percent diri ang indi madutlan sang 3 ukon mas masobra pa nga nagakalain-lain nga bulong.
Ginpunto man sang nasambit nga ahensya nga ang ini nga kagaw posible magtuga sang gastroenteritis kag iban pa nga mga malala nga balatian nga mabudlay hatagan sang nagakaangay nga pagbulong.
Madumduman nga naglab-ot sa 13,000 ang kaso sang Salmonella infection sang tuig 2023 sa pungsod nga nagtaas sang 42 porsiyento.
Apang, ginpaathag man sang DOST-FNRI nga safe sa gihapon kunsumuhon ang mga manok apisar nga indi ini madutlan sang antibiotics.
Ginaabisuhan man ang publiko nga maghugas sang kamot pagkatapos mag-uyat sang hilaw nga manok, dapat separado ini sa luto nga pagkaon, maggamit man sang separado nga suludlan para sa hilaw kag luto nga pagkaon, kag lutuon sang husto ang karne kag gilayon nga ibutang sa ref ang mga pagkaon nga madasig mapan-os.
