ILOILO CITY – Ginpanginbulahan sang Samahang Basketbol ng Pilipinas ang kadalag-an sang national basketball teams sa 32nd Southeast Asian Games sa pihak sang madamo nga mga pagtilaw.
Kahapon, liwat nga ginkuha sang Gilas Pilipinas ang men’s basketball gold medal sa Morodok Techo Elephant Hall 2 sa hampang batuk sa Cambodia, 80-69.
Magluwas pa diri, nakakuha ang Pilipinas sang silver medal sa women’s basketball, kag duha ka mga silver medals sa 3×3 basketball.
Suno kay Samahang Basketbol ng Pilipinas President Al Panlilio, ginpakita sang Gilas nga ang ila dungog sa pagpakigbato para sa pungsod ang mas mabaskog kun ikumpara sa iban pa nga motivation.
Naghampang ang team sa substandard conditions sa court, sa idalom sang tuman ka init nga tyempo kag nalampuwasan ang mga pilas agud lamang nga mangin proud ang Filipinos.
Wala nangin mahapos para sa Pilipinas ang pagkuha sang gold medal kasunod sang kalutusan sa Cambodia sa group stage— ang kalutusan nga gintawag ni Samahang Basketbol ng Pilipinas Chairman Emeritus Manny V. Pangilinan nga “disgraceful.”
Sang damlag lang, nagreklamo si Gilas Men’s coach Chot Reyes bangud sang temporary linoleum nga court nga masami pa nga ginabutangan sang tape sa tunga-tunga sang hampang.
Ang mga players ang nagakadanlog kag naka-agum sang injury.
Ginareklamo man ang tuman ka init nga tyempo bangud indi fully air-conditioned ang venue.
Samtang, ginkalipay man ni Reyes ang kadalag-an sang team bangud nagbunga ang pagpangabudlay sang mga players.
Gin-anunsiyo naman sini nga ini na ang katapusan niya nga pag-coach sa Southeast Asian Games.
Suno naman sa Gilas star player nga si Justin Brownlee, nakahanda ini nga maghampang sa anuman nga sahi sang court.
Ginpakigbahin man sini kun daw ano sini ka palangga nga mag-represent sang Pilipinas.
Pahayag pa niya, nabatyagan niya ang “unbelievable feeling” pagkatapos na sang hampang.
Ginakabig naman ini ni Brownlee nga pinakamadinalag-on sa tanan nga winning moments nga iya naagyan sa iya career.
Si Brownlee ang import sa Philippine Basketball Association kag nagahampang sa Barangay Ginebra franchise.
