Nagtapos sa technical draw ang sambuwa sang anay three-division world champion nga si John Riel “Quadro Alas” Casimero batok sa anay International Boxing Federation (IBF) world super bantamweight champion nga si Yukinori Oguni sa Koto-Ku, Japan.
Sa amo nga junior featherweight bout, tuman ang pagdugo sa tuo nga mata ni Oguni nga rason kun ngaa ginpa-check sang referee sa ringside doctor kag ginpauntat ang hampang 27 segundos pa lang sa ikaapat nga round bangud sang ginpahayag nga “accidental headbutt”.
Suno kay Bombo Josel Palma, international correspondent direkta sa Ariake Arena sa Koto-Ku, antes pa man ginpauntat ang hampang, agresibo na si Quadro Alas apisar nga mas mataas ang iya kasumpong halin sa host country.
Bangud sa amo nga draw, naguba ang rekord sang 34-anyos nga boksidor sa sunod-sunod nga kadalag-an sa siyam ka sambuwa.
Photo: Quadro Alas It’s My Boy/Facebook
Si Casimero man ang naga-uyat sang rekord bilang former IBF junior flyweight, IBF flyweight kag World Boxing Organization (WBO) bantamweight kag tatlo ka beses nga nakahampang bilang junior featherweight matapos nakakasan sang 118-pound belt sang wala sini naatubang ang mandatory challenger nga si Paul Butler sang 2022.
Ini naman ang ikaduha nga sunod-sunod nga hampang sang 35-anyos nga si Oguni nga nagtapos sa four-round technical draw nga sang tinalikdan nga Mayo 2022, natabo man sa iya away batok sa isa man ka Japanese boxer.
May tatlo ka iban pa nga hampang sa tunga sang Pilipinas batok sa Japan sa amo nga card.
Daog ang Filipino veteran nga si Froilan Saludar sang gintumba sini si Keita Kurihara isa ka minuto sa pagtungtong sini sa Oriental and Pacific Boxing Federation bantamweight title fight.
Si Vince Paras naman sang General Santos City ang nagdaog man via split decision batok kay Kai Ishizawa sa flyweight battle.
Samtang, ang former title challenger naman nga si Jeo Santisima ang nalutos paagi sa unanimous decision batok sa Japanese boxer nga si Kenji Fujita. #
