Indi maghalin si Aksyon Demokratiko senatorial bet Samira Gutoc sa iya nga partido apisar gin-ako sini nga kun kaisa, nagakadismaya siya bangud sa mga kritisismo nga ginabuy-an sang ila nga standard bearer nga si Isko Moreno Domagoso batuk sa 2019 senatorial slate kun sa diin siya nangin kabahin sadto.
Suno kay Gutoc, nagakakibot kag kun kaisa nagakabatyag siya sang awkwardness sa sitwasyon apang ginakabig niya nga pamilya ang iya partido subong.
Una na nga ginpakamalaot ni Domagoso si Vice President Leni Robredo kag ang political narrative sang grupo sang bise presidente sa diin ginpahayag sini nga “nagsarurot” ang mga nagpadalagan sa pagka-senador sang 2019 midterm elections nga ginsuportahan ni Robredo.
Matandaan nga wala sang ni-isa halin sa Liberal Party ukon Otso Diretso ang nakasulod sa Magic 12 sa pagka-senador sa diin sadto nagpadalagan man si Gutoc.
Pahayag niya, ang nangin “choice of words” ni Domagoso ang naka-offend sa iya.
Dugang pa sang natungdan, may mga supporters nga naga-engganyo sa iya nga maghalin na lang sa kampo ni Domagoso kag mag-upod sa 2022 slate ni Robredo apang nagapanindugan ini nga magapabilin siya sa Aksyon Demokratiko.
