Sampaw-sampaw nga kaso ang ipasaka batok sa suspek nga nagpalagyo sa drug buy-bust operation sang City Drug Enforcement Unit (CDEU) sa Barangay Balabago, Jaro, Iloilo City.
Ang mga subject amo sanday John Winston Porras, 30-anyos residente sang nasambit nga lugar; Lakip man sanday Jesus Angelo Martinez, 34-anyos, kag Berna Villarosa, 25-anyos residente sang Bolilao, Mandurriao, Iloilo City.
Sa interview sang Bombo Radyo kay Police Captain Ryan Christ Inot, chief sang City Drug Enforcement Unit, iya ginpahayag nga lakip sa mga kaso nga ipasaka kay Porras amo ang violation sa Republic Act 9165 ukon Comprehensive Dangerous Drugs Act of 2002, violation sa Republic Act 10591 ukon Comprehensive Firearms and Ammunition Regulation Act lakip na Commission on Election gun ban nga non-bailable.
Suno kay Inot, pasakaan man sang kaso nga attempted murder kag direct assault si Porras kasunod sang pagluntad sang linukpanay gamit ang iya armas-luthang.
Ginpahayag man sini nga napaidalom na sa paraffin test si Porras kag ginahulat na lang ang resulta sini.
Nahibaluan nga nga ang buy-bust operation ang nagresulta sa pagbaylohanay sang lupok sa tunga sang subject kag sa mga kapulisan bangud sa pagbato ni Porras sa kapulisan.
Nagdangat tanan sa P4,080,000 ang balor sang anum ka sachets kag 10 ka dalagko nga pinutos sang ginapasuni nga shabu nga ginabanta nagabug-at sang 600 grams ang nakuha kay Porras kag sa mga kaupdanan sini.
Magluwas diri, may yara pa sang caliber 45 nga pusil kag magazine nga may isa ka bala.
