ILOILO CITY – Sampaw-sampaw nga kaso ang mahimo ipasaka batok sa mga otoridad nga nagdakop sa ginatudlo anay commanding officer sang Communist Party of the Philippines – New People’s Army (CPP-NPA).
Ini ang may kaangtanan sa ginapahayag mistaken identity lamang ang pagdakop kay Baltasar Cresosto Saldo, 54, sang Brgy. Sto. Angel, Dumalag, Capiz.
Si Saldo ang ginatudlo nga si Virgilio Paragan alyas Hassan nga anay commanding officer sang Roger Mahinay Command-Komiteng Rehiyon Negros sang CPP-NPA.
Sa interview sang Bombo Radyo kay Atty. Jonnie Dabuco, Director sang Commission on Human Rights (CHR) 6, iya ginpahayag nga sampaw-sampaw nga administrative kag criminal case ang mahimo ipasaka ni Saldo batok sa mga otoridad nga nagdakop sa iya.
Sa pagpaathag ni Atty. Dabuco kun tani, ang pangalan nga nakasulat sa warrant of arrest ang kinahanglan nga magsanto sa identity sang tawo nga gindakop.
Bangud nga mistaken identity ang natabo, ginpahayag ni Atty. Dabuco, makabig nga illegal ang pagdakop kay Saldo nga ginapahayag ginsakit pa sang otoridad.
Mismo ang fiscal ang nagmandu nga hilwayon si Saldo bangud sa kakulang sang pamatuod.
Lakip sa mga kaso nga mahimo ipasaka sa mga nagdakop kay Saldo amo ang illegal detention, paglapas sa Anti-Torture Act of 2009, grave abuse of authority kag moral damages kasubong sang mental anguish, besmirched reputation kag sleepless nights.
Ginpasalig man ni Atty. Dabuco nga handa ang CHR nga magbulig kay Saldo.
