Sampaw-sampaw nga mga kaso ang mahimo atubangon sang driver sang pick-up truck nga nakabunggo sa isa ka motorsiklo sa Barangay Canas, San Dionisio, Iloilo kun sa diin tatlo ang patay.
Ang driver amo si alias Alex, 26-anyos nga negosyante kag residente sang Calinog, Iloilo.
Ang mga biktima amo sanday alias Artemio, ginabanta 60-anyos; alias Angelie, ginabanta 50-anyos; kag ang 15-anyos nga bata nila nga si alias Angelie, lunsay residente sang Barangay Cubay sa amo nga banwa nga amo ang sakay sang motorsiklo.
Sa interview sang Bombo Radyo Police Captain Edward Villanis, officer-in-charge sang San Dionisio Municipal Police Station, iya ginpahayag nga Reckless Imprudence Resulting to Multiple Homicide and Damage to Property ang posible ipasaka nga panumbungon batok kay alias Alex.
Suno kay Villanis, desidido man ang pamilya sang mga biktima nga magpasaka sang panumbungon.
Dugang ni Villanis, mahimo man pasakaan pa gid sang panumbungon nga Reckless Imprudence Resulting to Physical Injuries ang driver sang pickup truck bangud nga magluwas sa magpamilya, may isa pa ka driver sang motorsiklo nga nagasunod sa mga na-disgrasya ang nakaangkon man sang menor nga mga samad sa lawas.
Base sa imbestigasyon, madulom sa national highway kag sang ginaalegar nga sang nag-overtake ang pick-up truck, nayudyod sini ang motorsiklo sang ginabanta 100 metros.
Dead on the spot ang mag-asawa samtang nadala pa sa ospital sa Sara ang dalagita nila nga anak apang gindeklarar man nga ginbawian sang kabuhi.
Sa subong, nagapabilin nga detained sa San Dionisio Municipal Police Station ang driver sang pickup truck.
