San Dionisio LGU, luyag lab-uton ang company nurse sang ginatrabahuan sang lalaki nga ginapahayag nag-abiso nga negatibo ini sa COVID-19 nga sang ulihe natukiban nga positibo ini sa virus

SAN DIONISIO, ILOILO – Ginatun-an sang Municipal Inter-Agency Task Force sang San Dionisio, Iloilo kun pasakaan sang kaso ang lalaki nga positibo sa COVID-19 nga nagpauli sa banwa sakay sa Ceres bus.

Sa interview sang Bombo Radyo kay Mayor Larry Villanueva, iya ginpahayag nga Hulyo 30 sang nag-abot sa Iloilo halin sa Palawan ang lalaki.

Agosto 6 sang ginkuhaan sang swab sample para sa COVID-19 testing ang lalaki kag pahayag niya, gin-abisohan siya sang ila company nurse nga nag-negatibo ang iya resulta sa reverse transcription polymerase chain reaction (RT-PCR) test rason nga naglisensya ini nga kun mahimo makapauli siya sa San Dionisio.

Suno kay Mayor Villanueva, sang nagabyahe na ini sakay sa Ceres bus padulong sa banwa sang San Dionisio, gintawgan ang lalaki sang Barotac Viejo Rural Health Unit kag ginpahibalo nga nagpositibo ini sa COVID-19.

Indi lang mapat-od sang alkalde kun ngaa Barotac Viejo ang address nga ginbutang sang amo nga lalaki.

Ginpahibalo sang Barotac Viejo Rural Health Unit ang San Dionisio Rural Health Unit nga may magapauli sa ila banwa nga positibo sa COVID-19.

Bangud sini, gin-alerto sang San Dionisio ang composite team agud nga kuhaon ang amo nga lalaki sa sulod sang Ceres bus.

Sa subong, ginatinguhaan sang local government unit sang San Dionisio nga mahibaluan nga kun bala matuod ukon nagabinutig lang ang lalaki nga gin-abisohan ini sang ila company nurse nga negatibo sa COVID-19 ang iya resulta rason nga nagpauli siya sa nasambit nga banwa.