Napasa na sang local government unit sang San Enrique, Iloilo ang ila nga incident report sa Department of Health (DOH) kag sa Iloilo Provincial Health Office (PHO) may kaangtanan sa pagkaguba sang 167 COVID-19 vaccine doses.
Sa interview sang Bombo Radyo kay Atty. Suzette Mamon, Iloilo Provincial Administrator, iya ginpahayag nga gina-imbestigahan na subong sang PHO ang natabo.
Una na nga ginpahayag ni Mayor Trixie Fernandez nga may yara sang natabo nga 10 tubtob 15 ka minutos nga brownout sa diin wala sang advisory nga ginpapanog ang electric company antes ang power interruption.
Sa kinaandaan, may ginahanda nga generator set ang LGU agud nga mapabilin ang required temperature sa anum ka mga refrigerators sa banwa.
Suno kay Fernandez, bangud nagbalik man gilayon ang kuryente, wala na gingamit ang generator set.
Ulihi na sang natalupangdan nga may isa ka refrigerator nga wala nag-automatic sa pag-power on.
Sang gin-check sang Municipal Health Office (MHO) suno kay Fernandez, naglab-ot na sa 10 degrees Celsius ang fridge temperature.
Ang bakuna sang Sinovac ang dapat nga taguon sa normal fridge temperatures nga 2 tubtob 8 degrees Celsius lang agud nga indi mapan-os.
