Nakahanda na ang San Jose Parish Placer, Iloilo City para sa mga religious activities bilang kabahin sang selebrasyon para kay Señor Sto. Niño.
Sa interview sang Bombo Radyo kay Lilibeth Tumulak, Presidente sang Confradia Del Sto. Niño de Cebu kag Iloilo City Chapter, ginpahayag sini nga nagapadayon na ang nagkalain-lain nga aktibidad lakip ang paglibot sang imahen ni Sr. Sto. Niño.
May ara man sang patigayunon nga pagbendisyon sa parokya bilang pagpabakod sang espiritwalidad sang mga tumuluo.
Para naman sa mga nagahilapit nga aktibidad, ginpahayag sang San Jose Parish nga nagapakig-angot sila sang hugot nga koordinasyon sa Philippine Coast Guard (PCG) kag Philippine National Police (PNP) agud masiguro ang matahum kag malinong nga pagpatigayon sang fluvial parade.
Lakip sa mga ginahingadlan nga daku nga aktibidad ang Grand Religious Sadsad, Fluvial Parade, kag ang Traslacion sa Byernes, amo man ang Blessing of the Children.
Nagapahanumdom man ang simbahan sa publiko nga ang mother boat magahalin sa Fishing Port pakadto sa Muelle Loney.
Nagapanawagan ang parokya sa mga deboto nga mag-ugyon sa disiplina nga ginapatuman, magbuligay, kag magsunod sa mga layi sang awtoridad, agud mangin malinong ang selebrasyon sang nasambit nga religious activities.
