Ginpanginwala sang San Miguel Corporation nga nag-atras sila sa plano nga P7.8 bilyon nga Boracay Bridge nga maga-angot sa Boracay Island kag Caticlan sa Aklan.
Suno kay Ramon Ang, chairman kag CEO sang San Miguel Corporation,wala sang kamatuoran ang balita nga nagapaguwa nga nag-atras ang iya kompanya sa amo nga proyekto.
Ini matapos ginpahayag ni Aklan Governor Jose Enrique Miraflores sa isa ka stakeholders meeting sa isla, nga nag-withdraw si Ang sa controversial bridge project.
Nahibaluan nga ang proyekto nga gintugyan sa San Miguel Corporation pinaagi sa iya infrastructure arm ang isa ka public-private partnership kaupod ang Department of Public Works and Highways.
Plano sini nga magtukod sang 2.54 kilometros nga taytay kag dalan para sa salakyan, pedestrian, bisikleta, kag utilities.
Madamo man ang nagkontra sa proyekto—lakip na ang mga boatmen, environmental groups, kag iban nga sektor—bangud sa epekto sini sa marine ecosystem sang Boracay kag ang pangabuhian sang mga residente.
