ILOILO CITY- Ginpabugal sang Ilonggo nga si Senator Franklin Drilon ang pag-invest sang isa sa pinakadako nga korporasyon sa pungsod,ang San Miguel Corporation, sang duha ka dalagko nga mga proyekto sa Iloilo kag Guimaras.
Ini kasunod sang pagsinapol nga gintambungan sang senador kaupod sanday Mayor Jerry Treñas, Governor Arthur Defensor Jr. kag Ramon Ang, President kag Chief Operating Officer sang korporasyon.
Sa interview sang Bombo Radyo Iloilo sa Senate Minority leader, iya ginpahayag nga magatukod sang bottling plant kag brewery sa Leganes, Iloilo ang nasambit nga korporasyon.
Samtang, isa ka lime project naman ang ipatindog sa Guimaras.
Suno kay Drilon, subong nga Setyembre 20 na patigayunon ang groundbreaking para sa bottling plant.
Nagapati ang senador nga makabulig ini sa paghatag sang trabaho sa mga Ilonggo.
Magluwas diri , ang presensya sang nasambit nga korporasyon sa Iloilo ang magahatag man sang investment friendly nga imahe sang Iloilo para sa mga investors.
