Gin-klaro sang San Miguel Corporation nga ang ginaplano nga ₱7.78 bilyon nga Boracay Bridge Project ang padayon pa nga ginadiskusyonan kag wala pa dalayon nga ginbasura.
Ini apisar madamo sang nagapalapta nga reports nga nag-withdraw na sila.
Suno sa kompanya, ginakabalak-an lamang ang pila ka mga local sectors kaangay sang boat operators, transport groups, tricycle drivers, kag port workers sa posible nga epekto sa ila pangabuhian kun matigayon ang proyekto.
Nahibaluan nga una na nga ginapanindugan ni San Miguel Corporation chairman Ramon Ang nga indi pag-ipilit ang proyekto kon wala sang suporta halin sa mga komunidad.
Ginpahayag man sang kompanya nga padayon ang ila pagpakig-angot sa mga stakeholder kag ginadiskusyon ang mga paagi para sa mitigation, bulig sa pangabuhian, kag transition programs.
Suno pa sa kompanya, ang proyekto makabulig sa pagbuhin sang pressure kaangay sang sea transport kag magapaayo sang logistics kag access para sa mga residente, labi na sa emergency kag sa mga tawo sa lugar.
