Gin-athag sang Chinese embassy nga indi pa nila option subong nga dagdagan sang sanctions ang mga opisyal sang Pilipinas nga involved sa “word war” batok sa Chinese diplomats.
Sabat ini sang embahada sa mga komento sa ila post nga nagapanugyan nga magpaguwa sang penalidad batok sa mga Filipino lawmakers lakip na sa ila mga pamilya sa China.
Lakip sa ginapanugyan sang iban nga netizens amo ang pag-freeze sang ila propiedad sa China, ukon pagmandu sa Chinese citizens kag mga institusyon nga untatan ang pag-negosyar sa ila.
Suno naman sa embahada, indi pa ini option subong, bangud nagapati ang embahada suno sa ila nga may kahilwayan man sa pagpabutyag sang opinion ang mga Pilipino, kag may kahilwayan man ang embahada nga magsabat.
Matandaan nga sang nagligad nga sinemana, gindeklarar sang Municipality of Kalayaan sa Palawan bilang persona non grata si Ambassador Jing Quan. Bilang balos, gin-ban man sang China ang 16 local officials sang Kalayaan nga makasulod sa mainland China, Hong Kong, kag Macau.
Kun balikan, nagsingki ang “word war” sa tunga sang mga opisyal sang China kag Pilipinas matapos nag-file sang protesta ang China batok kay Philippine Coast Guard (PCG) spokesman for the West Philippine Sea Commodore Jay Tarriela bangud suno sa ila sa pagtamay sa Chinese leaders.
Ang sunod-sunod nga posts sang Chinese embassy ang ginpatasan naman kag ginsabat indi lamang ni Tarriela kundi sang mga senador, kongresista, kag iban pa nga mga opisyal sang Pilipinas.
Nagpasar man ang Senado sang resolusyon nga nagakondenar sa amo nga mga pahayag kag aktwasyon sang Chinese embassy.#
