Gindagdagan liwat sang Sandiganbayan Fifth Division sang 90-day preventive suspension si Senator Jinggoy Estrada.
Ini kaangot sa iya kaso nga plunder nga nag-ugat sa alegasyon sang kaangtanan sini sa flood control scandal.
Pirmado ni Associate Justice Zaldy Trespeses ang amo nga order kag ginsapubliko subong nga gab-i, Oktubre 12.
Ini nga mandu ang kasunod sang pagtapos sang una nga 90-day suspension nga gin-isyu sang Sandiganbayan Second Division sang Hunyo.
Sa resolusyon nga ginpagwa, ginmandu sang korte nga indi anay makapungko si Estrada bilang senador kag indi man siya makaserbisyo sa bisan ano pa nga pwesto sa gobyerno nga iya gina-uyatan subong.
Sang Oktubre 9, ginbasura sang korte ang mga motion for reconsideration ukon mga pangabay nga usisaon liwat ang ila nauna nga resolusyon sang Setyembre 1. Sa amo nga resolusyon, gintugutan ang mga piskal nga bag-uhon ang mga dokumento sang kaso kag kuhaon si anay Public Works Secretary Manuel Bonoan sa mga kaso.
“Once a proper determination of the validity of the information has been made, it becomes the ministerial duty of the court to forthwith issue the order of preventive suspension,” suno sa Sandiganbayan.
Nahibaluan nga suno sa Ombudsman, nakabaton si Estrada sang P573 million nga kickbacks sa alleged manipulation sang DPWH flood control project allocations sang 2025.
Sang Mayo 29, nagpaguwa ang Sandiganbayan Second Division sang arrest warrants batok kanday Estrada kag Bonoan kaangot sa kaso nga graft. Sang Hunyo 1 naman, nag-isyu ang Fifth Division sang second arrest warrant sa duha ka nasambit nga opisyal kaupod sa tatlo ka iban pa nga DPWH officials para naman sa nonbailable charge nga plunder.
