Gin-aprubahan na sang Sandiganbayan 6th Division ang mosyon sang Office of the Ombudsman nga i-consolidate ang mga kaso nga graft kag malversation batok kay former Ako Bicol representative Zaldy Co, kag pila ka opisyal sang Department of Public Works and Highways (DPWH) sa MIMAROPA, kag Sunwest Inc.
Matandaan nga ang graft case yara sa 5th Division, samtang ang malversation case naman amo ang ginadumala sang 6th Division.
Suno sa resolusyon sang korte, nagapakita nga naghalin lamang sa isa ka transaksyon ang mga kaso kag pareho man ang mga involved nga personalidad.
Ginpahayag pa diri nga sang nagligad, gin-raffle ang mga kaso sa nanuhay-tuhay nga division bangud wala pa nasugoran ang pormal nga imbestigasyon.
Ginsiling sang korte nga sa pag-consolidate sang mga kaso, mas mapadasig ang pagproseso kag pagresolbar sini.
Nahibaluan nga nag-ugat ang mga akusasyon sang graft kag malversation sa ginapatihan nga maanomaliya nga road dike project sa Naujan, Oriental Mindoro.
