ILOILO CITY- Igadangop sang Sangguniang Bayan sang Janiuay sa Office of the Ombudsman ang ila sitwasyon subong nahanungod sa atrasado nga sweldo sang mga empleyado kasunod sang pag-expire sang appointment sa ila nga officer-in-charge (OIC) treasurer.
Sa interview sang Bombo Radyo kay Sangguniang Bayan Member James Ian Adelantar, iya ginpahayag nga nagpasar sang resolusyon ang konseho agud hingyuon ang Ombudsman nga magpatigayon sang imbestigasyon kun may yara sang natabo nga pagpabaya sa bahin ni Mayor Paulino “Paul” Parian kun ngaa nangin kasubong ang sitwasyon sa ila munisipyo.
Suno kay Parian, tinguhaan nila nga sa Lunes, Hulyo 22, makompleto ang mga dapat nga pilirmahan sa amo nga resolusyon agud mapasa na ini sa Ombudsman.
Gin-athag naman ni Adelantar nga indi pagpasaka sang kaso ang ila himuon bangud ang papel nila amo ang paghimo sang ordinansa kag resolusyon kag itugyan nila sa Ombudsman kun may yara gid man sang kaso nga mahimo ipasaka sa sin-o nga opisyal sang banwa.
Nahibaluan nga nag-lapse ang appointment sang anay officer-in-charge treasurer nga si Emily Delos Santos sang nagligad pa nga Hulyo 2 kag bangud nga wala sang treasurer, yara subong sa “default” mode ang banwa kag indi mahulag ang tanan nga pondo.
