Gin-aprubahan na sang Iloilo Sangguniang Panlalawigan sa third and final reading ang Flood Prevention and Control Ordinance nga nagatinguha nga mapabaskog ang koordinasyon sang mga lokal nga gobyerno kag nagkalain-lain nga ahensya sa paglikaw kag pagkontrol sang pagbaha sa probinsya.
Ang Provincial Ordinance No. 2026-368, nga gin-author ni Board Member June Mondejar, nagalakip sang pagmintinar sang drainage systems, pagtinlo sang waterways, pagtanom sang kahoy kag pagpatuman sang mga patakaran batok sa mga aktibidad nga nagapugong sa pagdalagan sang tubig.
Sa interview sang Bombo Radyo kay BM Mondejar, iya ginpahayag ang importansya sang pagbinuligay sang provincial government, mga municipal kag city government, national government agencies, barangay officials kag iban pa nga stakeholders agud mas mapabaskog ang mga tikang sa paglikaw kag pagkontrol sang pagbaha sa probinsya.
Sa idalom man sang ordinansa, pagahimoon ang Provincial Flood Prevention and Control Coordinating Council, nga pagapanguluhan sang gobernador sang probinsya kun sa diin hibaluon ang mga flood-prone areas, magarekomendar sang angay nga solusyon kag i-coordinate ang pondo para sa flood prevention measures.
Gina-obligar man ang mga lokal nga gobyerno nga regular nga magtinlo kag magmentinar sang drainage systems, creeks kag iban pa nga waterways, amo man ang pagdumili sa paghaboy sang basura kag debris sa mga suba, sapa, drainage kag irrigation canals.
Pahayag pa ni Monddejar, ang mga malapas sa ordinansa pagapamultahan sang ₱3,000 sa first offense, ₱4,000 ukon pagkapreso tubtob pito ka adlaw sa second offense, kag ₱5,000 ukon pagpreso tubtob 15 ka adlaw sa third offense, ukon pareho, depende sa desisyon sang korte.
Dugang pa nga magapondo man ang probinsya sang indi magnubo sa ₱1 million sa masunod nga annual ukon supplemental appropriation ordinance agud suportahan ang implementasyon sini.
