ILOILO CITY – Magapasar sang resolution ang Sangguniang Panlalawigan nga naga-request sa senado nga magpatigayon sang inquiry in aid of legislation may kaangtanan sa kontrobersyal nga Ungka kag Aganan flyovers.
Ini ang kasunod sang ginpatigayon nga hearing sang Committee on Infrastructure sa Sangguniang Panlalawigan nga may tinutuyo nga mag-chekyar sang status kag timeline sang mga flyovers kag subong man, ang mga posible nga himuon agud nga masolbar ang problema sa Ungka flyover.
Sa interview sang Bombo Radyo kay Iloilo Fourth District Representative Rolando Distura, chairman sang komitiba, iya ginpahayag nga lakip man sa mga resolution nga ipasar sang board amo ang pag-request sa Iloilo City Government pinaagi kay Mayor Jerry Treñas nga magdugang sang traffic aides sa lugar agud nga mabuligan ang pagdelihir sang trapiko.
Ang kaangay nga request ang ipadala man sa local government unit sang Pavia, Iloilo.
Maga-request man sila sa Iloilo Police Provincial Office kag Iloilo City Police Office nga mag-deploy sang personnel nga magbulig sa area indi lamang subong nga wala sang construction works kundi mangin sa tion nga suguran na ang rectification.
Natukiban man sa committee hearing nga wala pa nakapasa sang final report ang third party consultant kag ginalauman nga makumpleto ini antes magtakup ang bulan sang Hunyo.
Ginpahayag man sang Department of Public Works and Highways Region VI nga wala pa nabayaran ang International Builders Corporation sa Phase II kag Phase III sang Ungka kag Aganan flyover.
Nagpahayag man ang director nga si Engr. Nerie Bueno nga indi siya magbayad bangud posible nga magkaproblema siya.
