ILOILO – Nagpasar sang duha ka resolution ang 13th Sangguniang Panlalawigan ng Iloilo may kaangtanan sa wala pa nasolbar nga kaso sang Marso 3 nga stabbing incident sa General Luna St., Iloilo City Proper kun sa diin biktima ang human rights lawyer nga si Atty. Angelo Karlo Guillen.
Ang una nga resolution ang ginduso ni 5th District Board Member Carol Espinosa-Diaz, classmate ni Atty. Guillen sang nagaeskwela pa sa law school.
‘Cowardly and disgusting act of impunity’ ang paglaragway ni Diaz sa natabo nga pagbuno sang screwdriver sa dungan-dungan sang biktima.
Ginpahayag man ni Diaz nga nagapatimaan lang ini sang nagataas nga kaso sang pagpang-atake batok sa mga abogado sa Pilipinas.
Ginpanawagan man sini sa Integrated Bar of the Philippines nga ipatuman ang Law Practitioner Protection Program agud mapangapinan ang mga abogado.
Ginduso man ni 4th District Board Member Domingo Oso, Jr. ang resolution nga nagapanawagan sa Philippine National Police nga magpatigayon sang maid-id nga imbestigasyon may kaangtanan sa insidente.
Si Oso amo ang Vice President of Law Alumni Association sa unibersidad kun sa diin nag-eskwela si Atty. Guilllen.
Sa interview sang Bombo Radyo kay Oso, iya ginpahayag nga dapat nga mag-imbestigar ang mga pulis kag magpresentar sang mga suspek agud malikawan sang publiko nga magpanumdom nga ‘state sponsored activity’ ang natabo.
Una diri, may mga grupo na nga nagapahayag nga pulis kag militar ang yara sa likod sang pagpang-atake kay Guillen — butang nga ginpanginwala naman sang state forces.
