Magahingyo ang Sangguniang Panlalawigan ng Iloilo sang dugang nga COVID-19 vaccines halin sa gobyerno sang Canada.
Ang resolusyon ang ginduso ni Iloilo Fourth District Board Member Rolando Distura kag gin-aprubahan unanimously sang mga nagtambong sa session sa Sangguniang Panlalawigan.
Sa interview sang Bombo Radyo kay Distura, iya ginpahayag nga gin-address ang resolution kay Canadian Prime Minister Justine Trudeau kag ipaagi kay Canadian Ambassador to the Philippines Peter MacArthur.
Una na nga ginpahayag sang embahada sang Canada sa Pilipinas nga may yara sang surplus ukon sobra nga COVID-19 vaccines sa amo nga pungsod.
Ginapahayag nga ang amo nga North American country ang may yara sang 180 million doses sang bakuna para sa kapin 40 million nga populasyon; buot silingon, may yara pa sang mabilin nga kapin 100 million doses.
Santo sa website sang Canadian government, ang COVID-19 vaccine brands nga ginagamit sa amo nga pungsod amo ang Pfizer, Moderna, COVISHIELD, AstraZeneca kag Janssen.
Ang Pilipinas ang nag-grant sang emergency use authorization sa sini nga mga drugmakers magluwas lang sa COVISHIELD.
Suno naman kay Distura, kun mangin positibo ang resulta sa sini nga hingyo, magaagi man gihapon ang donasyon sa national government apang ginalauman nga may ipain gid nga suplay para sa probinsya sang Iloilo.
