ILOILO CITY- Dako nga bulig sa industriya sang cockfighting kon pamatian sang mga opisyal sang probinsya sang Iloilo ang hingyo sang mga breeders kag cockpit operators nga tugutan ang online streaming sang bulang kag dugangan ang mga attendees sa sulod sang bulangan.
Sa interview sang Bombo Radyo kay Atty. Jojo Lutero, isa sa Board of Directors sang Panay Gamefowl Breeders Association (PAGBA) kag convenor sang Responsible Cockpit Operators Association in Panay and Guimaras, iya ginpahayag indi lang mga manugbulang ang makabenepisyo diri.
Suno sa iya,mabuhi man ang negosyo sang mga nagabaligya sang bubod kag bulong sang manok, mabalik man ang trabaho sang mga empleyado sang bulangan, liwat nga mabuhi ang market sang mga breeders kag madamo pa.
Pahayag pa sang opisyal, kun panumdumon, mas dako ang benepisyo sa pagbalik sang industriya sang bulang kun ipaanggid sa halit nga matuga sini sa kampanya sa pagtapna sa COVID-19.
Nahibaluan nga nagpatigayon sang committee hearing ang Committee on Games and Amusement tuhoy sa nasambit nga hingyo sang mga grupo nga makapatigayon sang online bulang kag madugangan ang kapasidad sang attendees sa bulangan.
Samtang sa bahin naman sang Sangguniang Panlalawigan, ginpahayag ni Ex-officio Board member Ramon Sullano nga ginkasugtan na nila nga mahimo makapatigayon sang delayed digital broadcasting sang bulang ang grupo sang mga breeders kag cockpit operators sa Iloilo.
Suno kay Sullano, ini bangod nga nasaad sa guidelines sang Inter-Agency Task Force nga wala ginatugutan ang live streaming sang bulang.
Ginpahayag sang opisyal nga magapasar sila sang Resolution of No Objection sa delayed digital broadcasting sang bulang kag resolusyon nga tugutan ang pagdugang sang tubtub 30 porsyento sang total capacity ang attendees.
Magadepende naman sa Local Government Unit ang pagplastar sang pagsulundan agud mapatuman ang mga health protocols.
