Kun wala sang written complaint nga mabaton, indi mag-akto ang Sangguniang Panlalawigan ng Iloilo.
Panindugan ini ni Board Member Ramon Sullano, chair sang Public Utilities Committee sang Sangguniang Panlalawigan ng Iloilo, may kaangtanan sa problema sang ordinaryo nga mga konsumidor sa balayran sa kuryente sa mga electric cooperatives sa probinsya.
Sa interview sang Bombo Radyo kay Sullano, iya ginpahayag nga nakalab-ot naman sa iya nga talatapan nga may pagsaka sa balayran sa kuryente sa ILECO II kag III apang ‘For information’ lang ang notice nga iya nabaton.
Suno sa natungdan, wala siya sang ideya nga ang rate increase sa kuryente ang may kaangtanan sa naguba nga high-voltage submarine cable sang National Grid Corporation of the Philippines (NGCP).
Sang naguba ang cable sang NGCP bangud nasalapay sang naga-dredging kag re-channeling ang katapo sang DPWH sa Bio-os River sa Barangay Jagna, Amlan, Negros Oriental, nabuhinan ang transmission capacity sang NGCP sa power distribution utilities sa Panay kag Negros Islands kag naapektuhan ang presyo sa merkado.
Nagapanindugan si Sullano nga mas maayo gihapon kun may yara sang pormal nga reklamo nga mapasaka sa iya nga komitiba agud nga “malantaw ang side sang konsumidor amo man ang side sang electric cooperative.”
Diri suno sa iya makit-an kun VALID ang pagpasaka sang presyo sa kuryente. “Indi man sala sang electric cooperative, indi man sala sang consumer” suno sa natungdan kun ngaa may pagsaka sa rate.
“Kun wala sang written complaint, ga-hesitate man kita kay basi kun makwestyunan man kita nga wala man sang valid complaint nga ginpasaka sa aton nga komitiba,” suno pa sa board member. Bukas ang Sangguniang Panlalawigan anuman nga oras kun may magpasaka na sang reklamo.
