Ginaplano sang Committee on Public Order and Security sang Sangguniang Panlalawigan sang Iloilo nga magpaguwa sang mga resolusyon nga nagaduso sa Department of Works and Highways (DPWH) Region 6 nga i-review kag pasiguraduhon nga wala na sang may matabo nga ‘fallen debris’ sa Ungka Flyover.
Sa interview sang Bombo Radyo kay Iloilo 2nd District Board Member June Mondejar,chairman sang Public Order and Security, iya ginpahayag nga ang tikang ang magatulod man sa kontaktor sang flyover nga magbutang sang safety personnel.
Nagapati naman ang natungdan nga kon may safety officers sa lugar, matalupangdan sang mga motorista ano man nga hazard nga posible matuga sang proyekto.
Suno kay Mondejar, tutokan man sang komitiba ang masami nga reklamo nga madanlog ang flyover ilabi na kon bag-o lang ini tapos paidalom sa jet grouting.
Kon balikan, isa ka pulis ang anay nagreklamo kasunod sang pagkahulog sang debris halin sa flyover nga nag-igo sa helmet sini samtang nagamaneho sang motorsiklo.
Kaangot diri, sang damlag lang, nataktakan sang semento halin sa Flyover ang driver man sang motorsiklo nga papauli kuntani sa Cabatuan, Iloilo halin sa trabaho.
