ILOILO CITY – Nagpanugyan ang Iloilo Provincial Board sa publiko nga likawan ang pagpadulong sa lugar nga may yara sang ginapahayag presensya sang iligal nga droga.
Sa interview sang Bombo Radyo kay Iloilo Second District Board Member June Mondejar, chairman sang Public Order and Security sa Sangguniang Panlalawigan, iya ginpahayag nga dako nga huol ang matuga sa tion nga madakpan kag magdepensa sang kaugalingon ukon magpasaka sang kaso batuk sa otoridad kun may makita nga iregularidad.
Posible suno kay Mondejar nga may yara sang ginasandigan nga probisyon sa Republic Act 9165 ukon Comprehensive Dangerous Drugs Act of 2002 ang otoridad sa pagdakop sang mga indibidwal nga yara sa palibot sang drug den apang dapat, ang ginbasehan ang lihitimo man.
Agud nga malikawan nga makasuhan, mas maayo suno sa natungdan nga indi nagid magkadto sa lugar kun wala man lang sang importante nga kinahanglan.
Ginklaro ni Mondejar nga mahimo nga magreklamo ang isa ka indibidwal nga sa pamatyag niya, nalapas ang iya tawhanon nga kinamatarong.
