ILOILO CITY- Ginalantaw sang Sangguniang Panlalawigan sang Iloilo ang posibilidad sang pagpasar sang resolusyon nga magaduso sang pagpadasig sang dalagan sang imbestigasyon angot sa Claire Diergos Murder Case.
Sa interview sang Bombo Radyo kay Board Member Jun Mondejar, Chairman sang Committee on Public Order and Security, iya ginpahayag nga antes ang ila una nga session sa palaabuton nga Enero 11, ila istoryahan kun ilakip nila ini sa mangin agenda.
Suno kay Mondejar, ila man tun-an kun ano ang mangin bentaha kag disbentaha kun magapasar gid man sila sang resolusyon.
Apang gin-athag sang opisyal nga ginakilala nila ang pagpaninguha sang Philippine National Police agud masolbar ang kaso angot sa kamatayon ni Diergos.
Matandaan nga nasapwan nga wala na sang kabuhi kag puno sang pilas tuga sang pagkabuno si Diergos sa sulod sang iya salakyan sa kilid sang dalan sa Brgy. Inangayan, Sta. Barbara, Iloilo sang Oktubre 26,2021.
