ILOILO – Wala ginadula ni Iloilo 2nd District Board Member Jun Mondejar ang posibilidad nga magadihon sila sang resolution sa Sangguniang Panlalawigan nga naga-request sang congressional inquiry may kaangtanan sa problema sa sulod sang Western Visayas Sanitarium and General Hospital.
Si Mondejar amo sadto ang naghatag sang previlege speech sa Sangguniang Panlalawigan may kaangtanan sa delayed nga sweldo sang mga empleyado sang nasambit nga ospital.
Enero sang natigayon ang committee hearing sa Sangguniang Panlalawigan, apang Abril na kag wala pa nasolbar ang problema.
Sa interview sang Bombo Radyo kay Board Member Mondejar, iya ginpahayag nga sa tion nga makit-an ga indi epektibo ang interventions sang mga ini, mangita ang ini sang iban nga paagi agud masolbar ang problema sa ospital.
Suno kay Mondejar, gina-engganyo sini ang Department of Health nga hatagan sang igtalupangod ang problema sang mga empleyado kag pasyente nga tuman ka apektado.
Nagpanawagan naman ang natungdan nga indi na pagdalahigon pa sang hospital chief kag accountant ang iban nga mga tawo agud indi maapektuhan ang kalidad sang serbisyo sang ospital.
Sa subong, ginahulat na lamang sang mga ini ang imbestigasyon sang fact finding committee natuhoy sa mainit nga isyu sang ospital.
