𝗜𝗟𝗢𝗜𝗟𝗢 𝗖𝗜𝗧𝗬 – Gin-anunsyo sang Iloilo City Government ang pagsirado sang Sanitary Landfill sa Calajunan, Mandurriao sa 2026.
Ang ini ang desisyon ang santo sa guidelines sang Department of Environment and Natural Resources (DENR) sa diin ang mga landfill ang mahimo lang nga magamit sang tubtob 10 ka tuig.
Sa interview sang Bombo Radyo kay Engineer Neil Ravena, Head of the General Services Office (GSO), iya ginpahayag nga nalab-ot na sang sanitary landfill sang syudad ang lifespan.
Ang 10-year operational period sang landfill nga nagbukas sang 2016 ang makalab-ot na sa iya operational period sa 2026, kag kinahanglan na nga i-shut down santo sa regulasyon sang DENR.
Paathag ni Ravena, ini ang rason sa iya pagduso sa updated 10-Year Solid Waste Management Plan nga gin-aprubahan sang Iloilo City Council.
Ang updated plan ang importante nga proseso sa pagkuha sang permit para sa construction sang Integrated Solid Waste Management Plant sa Barangay Ingore, La Paz.
Nalakip man diri ang desinyo sa planta agud mag-generate sang electricity halin sa basura.
Ginpahayag ni Ravena nga may yara na lang sang 18 ka bulan agud makumpleteo ang bag-o nga waste facility.
Nahibaluan mga magluwas sa Iloilo City, nagabubo man sang basura sa Calajunan, Mandurriao ang mga banwa sa Iloilo nga ginalakipan sang Oton, San Miguel, kag Pavia.
Kada adlaw, nagadangat sa 400 ka tonelada sang basura ang matipon sang syudad, kag ang bag-o nga facility ang ginalauman nga makapahagan-hagan sini.
Ang Integrated Solid Waste Management Plant ang maga-feature sang material recovery center sa diin i-proseso ang basura kag waste-to-energy system agud ma-convert ang organic materials sa usable energy samtang ang non-organic nga basura ang separado nga i-proseso.
Sa subong, ginaproseso na sang Iloilo City Government ang nagakaigo nga permit para sa bag-o nga facility.
Samtang ang Environmental Compliance Certificate (ECC) ang gina-review na sa central office sang DENR.
Sa tion nga maaprubahan, umpisahan na ang 18 ka bulan nga construction sang facility.
