Kun basketball ang pagahambalan, wala sang paglubad ang pangalan ni Michael Jordan sa bilog nga kalibutan.
Halangpon man kun ngaa kada basketball fan gusto gid sang iya picture, pirma, ukon bisan ano nga memorabilia!
Nakahibalo ka bala? Nabaligya sang damlag lang sa balor nga $2.2 million ukon katumbas sang masobra P121 million ang pares sang sapatos nga ginsuksok sang nasambit nga NBA superstar!
Suksok ni Jordan ang “Bred” Air Jordan 13s sang Game 2 sang 1998 NBA Finals sang padulong na siya sa iya ika-anum kag katapusan nga NBA championship title.
Matapos nga nabaligya ang sapatos sa amo nga balor, si Jordan subong ang nabutang sa posisyon bilang “most valuable athlete” sa auctions para sa sportswear memorabilia.
Indi man ini ugaling bag-o para sa amo nga basketball great bangud sang nagligad nga tuig, nabaligya ang isa sa iya jerseys sa balor nga $10.1 million ukon masobra P557-million nga amo ang pinakamahal sa auction nga halin sa mga nasuksok sang mga atleta sa hampang.
Suno sa auction house, may autograph ni Jordan ang amo nga sapatos kag ginhatag sa ball-boy pagkatapos sang hampang sang 1998.
Kilala ang amo nga sapatos bilang “Bred” bangud sa “black and red color”, ang istilo nga ginasuksok ni Jordan sa kalabanan sang iya nga mga hampang sa NBA.
