Nagbuwelta si House Assistant Majority Leader kag Zambales 1st District Rep. Jay Khongkun nga dapat magpaidalom na si Vice President Sara Duterte sa “psychological assessment” bangud sa makaalarma sini nga mga pamahog batok kay President Ferdinand Marcos Jr.
Kaangot ini sa press conference ni Sara sang Oktubre 18 kun sa diin ginbulgar sini nga ginpaandam sini anay si presidential sister Sen. Imee Marcos nga kun magpadayon ang mga atake-pulitika batok sa iya, kutkuton sini ang bangkay sang late president nga si Ferdinand Marcos, Sr. sa Libingan ng mga Bayani kag ihaboy sa West Philippine Sea.
Suno kay Khongkun, wala sang rasonable nga tawo ang magahimo sang kaangay sini nga statement.
“No reasonable person would conceive of, much less make, this kind of statement. The level of irrationality in her words is deeply alarming,” pahayag sang kongresista. “She should undergo a thorough psychological assessment to be sure that she can still serve the country given this critical position.”
Gindugang sini nga ang mga pamahog ni Duterte ang pamatuod nga nga makaalarma na ang lebel sang “instability” sini kag dapat i-check gid suno sa iya kun may makaserbe pa ini sa pungsod bangud kritikal ang iya posisyon.
“The alarming behavior of the Vice President reveals a deeper problem that needs to be addressed,” dugang sa iya statement.
Pagkatapos naman sang iya ginpangbuyagyag sa iya press conference, daw wala lang sang natabo para kay Sara kag wala man ini nagasapak sa mga komento sa iya.
Spotted ini sa Baclaran sa Parañaque City base sa photos nga gin-share sang Baclaran Tourism Board.
Makit-an si Sara nga nagabakal sang streetfood sa guwa sang Our Lady of Perpetual Help Church kun sa diin siya nagsimba. Nagpa-picture man ini kaupod ang mga tumandok sa amo nga lugar.
Natabo ini nga paglagaw ni Sara pila ka oras lang matapos ang iya presscon sang Biyernes kun sa diin ginpuno sini sang atake ang iya anay ka-tandem nga si President Marcos.#
