Ginpanginwala ni Davao City Mayor kag vice-presidential aspirant Sara Duterte-Carpio nga may mga plano nga buslan sini si presidential aspirant Ferdinand “Bongbong” Marcos Jr. sa pagka-presidente kun ma-disqualify ini sa posisyon.
Suno kay Duterte-Carpio nga amo subong ang runningmate ni Marcos, kalain pamatian sang amo nga ideya bangud wala pa gani sila magdaog sa eleksyon kag wala pa sang may natabo nga eleksyon.
Ginpahayag sini nga wala niya gina-entertain ang ideya nga may posible nga pagbulos nga matabo kag wala man sini ginapanan-aw ang senaryo nga ma-disqualify ang iya nga runningmate — ‘antes’ man ukon ‘pagkatapos’ sang eleksyon.
Ginpanindugan man sang presidential daughter nga nagapati siya nga indi ma-disqualify si Marcos bangud lunsay wala sang basehan ang mga kaso nga gin-file batok sa iya nga kandidatura sa pagka-presidente.
Gintudlo sini ang mga anti-Marcos nga amo ang nagpamuno sa mga kaso. Wala pa napa-guwa sang Commission on Elections (Comelec) ang ila nga desisyon angot sa disqualification cases sa amo nga presidential aspirant. ##
