Ginhangkat ni Vice President Sara Duterte ang mga miyembro sang Kamara nga imbestigaran man ang Office of the President (OP) nga amo ang gin-deklarar sang state auditors nga nagapanguna sa paggasto sang confidential and intelligence funds para sa 2023.
Sa iya nga press conference sini nga semana, ginpahayag ni Sara nga dapat nga indi lamang iya opisina ang usisaon kun tinutuyo gid man sang mga kongresista nga magpasar sang layi nga kaangot sa paggamit sang confidential funds.
Sa tinaga ni Sara, gina-“target”, gina-“terrorize”, kag gina-“torment” ang mga empleyado sa iya opisina.
“If you are in aid of legislation and want to legislate about confidential funds, you do not target one office and terrorize and torment the employees of that office. What you do is you do a sampling, a random sampling of the offices who have confidential funds,” suno sa bise-presidente.
Diri na nga bahin kag iya ginsal-ot nga dapat man nga i-“call out” ang opisina ni President Ferdinand Marcos, Jr. nga may “billions and billons” sang confidential funds suno sa iya.
“Why not call the Office of the President who has billions and billions of confidential funds if you want to legislate about the confidential funds? So that shows that they’re singling out the Office of the Vice President. And I really feel that it’s very disrespectful to the Office of the Vice President,” pahayag pa sini.
Kun basehan ang Annual Financial Report sang Commission on Audit (COA), ang opisina ni President Marcos ang may highest amount sang confidential expenses nga may kapareho man nga lebel sang nagligad nga tuig.
Naggasto ang OP sang P2.25 billion kag P2.31 billion sa confidential and intelligence funds sang 2023 nga katumbas sang P4.56 billion.
Sa pihak nga bahin, nangin sentro naman si Sara sang dalagan sang imbestigasyon sang House Committee on Good Government halin pa sang nagligad nga binulan bangud sa gina-alegar nga mga anomaliya sa paggamit sang confidential funds sang OVP kag Department of Education sang 2022 kag 2023.
May duha man nga impeachment complaints nga ginapangatubang ang bise-presidente bangud sa alegasyon sang corruption, bribery, betrayal of public trust kag other high crimes nga gina-angot sa alleged misuse sang public funds sang OVP kag DepEd nga yara man anay sa idalom sang iya liderato.#
