Milagro ang kinahanglan agud nga islan sang presidential daughter nga si Davao City Mayor Sara Duterte-Carpio ang iya pamat-od nga magpa-reelect bilang alkalde sang syudad sang Davao.
Ini ang sabat sang iya utod nga si Davao City Vice Mayor Sebastian “Baste” Duterte sang ginpamangkot kun posible ayhan nga maglain ang desisyon ni Sara kag posible ayhan nga magpadalagan ini bilang presidente.
Matandaan nga sang Sabado, Oktubre 2, sang nag-file si Sara sang Certificate of Candidacy (COC) agud magpadalagan liwat sang isa pa ka termino bilang alkalde.
Sang amo man nga adlaw, nag-file man si Senator Christopher Lawrence ‘Bong’ Go sang COC agud magpadalagan sa pagka-bise presidente sa idalom sang Partido Demokratiko Pilipino–Lakas ng Bayan (PDP-Laban).
Sang amo man nga adlaw, nakatabinas si Presidente Rodrigo Duterte kag namensyonar sini nga SARA-GO sa gihapon ang mapadalagan sa 2022 national elections.
Wala sang paathag nga nakuha halin kay Sara apang suno sa iya utod nga si Baste, kilala niya si Sara nga wala sini ginasulit kun ano na ang iya nahambal.
Kun balikan naman ang una nga pahayag ni Sara, isa lang sa ila ni Presidente Duterte ang mapadalagan sa national position apang sang Sabado, nagkumpirma man si Presidente Duterte nga ma-retire na siya sa politika.
